Трэнер «Віцебска» Юпатаў: «Мы прыехалі, каб абараніць тытул»

Галоўны трэнер «Віцебска» Раман Юпатаў пракаментаваў выхад у фінал Кубка Салея.

– Віншуем з перамогай. Без асаблівых складанасцяў прайшлі суперніка па 1/2. Ці засталіся задаволеныя гульнёй?

– Я б не сказаў, што гульня лёгкая, у «Брэста» таксама было шмат момантаў, як і ў нас. Забілі ўдалыя галы. Абедзве каманды былі вартыя выхаду ў фінал. Два тыдні не было гульняў, таму некаторыя моманты пакідаюць жадаць лепшага. Аднак хлопцы малайцы, самааддана біліся і змаглі выйсці ў фінал.

– Ведаем, што рыхтаваліся. Арандавалі канадскую пляцоўку для трэніровак. Але гульні – зусім іншая справа. Наколькі сёння хакеістам было камфортна выступаць у такім фармаце?

– Не мы адны. «Юнацтва» пасля нас прыехала на наступны дзень. Кубак летні, але ўжо ўсе два месяцы катаюцца. Лічу, што ўсе каманды набралі тонус. Можа, тэхнічныя напрацоўкі не ва ўсіх атрымліваюцца... Нам жа трэніроўкі дапамаглі. Дзякуй вялікі дырэктару за тое, што пайшоў да нас на сустрэчу і дапамог выбудаваць трэніравальны працэс крыху па-іншаму.

– Некалькі слоў пра «Шахцёра». Ці плануеце вы абараніць тытул?

– Мы для гэтага сюды і прыехалі, але заўтра наша задача – забіць на адну шайбу больш, чым супернік, – сказаў Юпатаў.