Карпіцкі, Капленка і Кудравец пакуль што цягнуць толькі ўзровень Д4 Расіі. Нечаканы лёс зорачак белфутболу
А за іх жа заплацілі добрыя грошы.
За апошнія два трансферныя акны ў клубы элітнага дывізіёна Расіі па футболе з'ехалі тры маладых беларусы, якія па ўзросце могуць выступаць за зборную U-21. Спачатку ў ліпені мінулага года ў «Крылы Саветаў» адправіўся 20-гадовы нападнік Ягор Карпіцкі. Затым у жніўні кантракт з маскоўскім «Дынама» падпісаў 20-гадовы брамнік Андрэй Кудравец, які з'яўляецца падпісантам за рэпрэсіі. Ну а ў лютым-2024 у «Арэнбург» перайшоў 18-гадовы Цімафей Мартынаў.
За кожнага расійскія клубы заплацілі адступныя. Па звестках партала Transfermarkt, за Карпіцкага далі 730 тысяч еўра, за Кудраўца – 400 тысяч (па інфармацыі «Трыбуны», на пару дзясяткаў тысяч меней), а за Мартынава – сціплыя 30 тысяч.
На сёння не скажаш, што Расія скарылася беларускім талентам. Карпіцкі пасля трансферу спачатку стабільна зʼяўляўся на полі – узяў удзел ва ўсіх сямі стартавых турах чэмпіянату Расіі і набраў 1+1 па гол+пас. Але з сярэдзіны верасня страціў трэнерскі давер. З таго моманту ў РПЛ правёў тры матчы (сумарна 10 хвілін), а апошняе зʼяўленне на полі датаванае 25 лістапада.
Сваім становішчам у «Крылах» Карпіцкі быў незадаволены і нават хацеў вярнуцца ў чэмпіянат Беларусі, але адгаварыў трэнер «Шахцёра» Станіслаў Сувораў, які параіў старанна працаваць на трэнінгах. Пакуль гэта не дапамагло: пасля зімовай паўзы Карпіцкі ні разу не згуляў за першую каманду «Крылаў», а на апошні матч РПЛ супраць «Балтыкі» (1:2) увогуле не патрапіў у заяўку, што здарылася ўпершыню пасля пераходу. Карпіцкага адправілі за гульнявой практыкай у другую каманду самарцаў, якая выступае ажно ў расійскім Д4. Там ён правёў ужо два матчы, абодва ад званка да званка. У апошнім з ніжнегародскай «Хваляй» (1:1) вызначыўся эфектным не дрэнным голам з карэкцыяй на ўзровень суперніка – забіў пяткай і дапамог камандзе здабыць нічыю:
У той жа Д4 адправілі і Кудраўца. Брамнік так і не дэбютаваў за першую каманду маскоўцаў, нягледзячы на памылкі свайго канкурэнта Ігара Ляшчука.
Галоўны трэнер «Дынама» Марцэл Лічка палічыў за лепшае замяніць касячнага галкіпера ветэранам і выхаванцам клуба Антонам Шуніным, а не маладым беларусам. У выніку Кудравец, які тройчы трапляў у заяўку на матчы РПЛ, адправіўся гуляць за дубль. За другую каманду ён дэбютаваў 21 красавіка ў матчы з рэзервістамі маскоўскага «Спартака» (2:2). У галах асаблівай віны Кудраўца няма, хаця, здаецца, у эпізодзе з другім мячом (адзнака 3:01) шанцы выратаваць каманду былі, але перашкодзіў уласны абаронца (першы гол на 1:33):
Не атрымліваецца ў Расіі на сёння і ў Мартынава. Малады форвард двойчы трапляў у заяўку «Арэнбурга» і нават мусіў дэбютаваць у кубкавым матчы з «Ахматам», але на трэнінгу парваў пярэднюю крыжападобную звязку і выбыў на доўгі тэрмін:
Варта заўважыць, што з недахопам гульнявога часу, а бывае, што і з поўнай яго адсутнасцю сутыкаюцца не толькі маладыя беларусы. Дзяніс Шчарбіцкі, які падпісаўся з «Уралам» мінулым летам, за екацярынбуржцаў пакуль не дэбютаваў – з верасня мінулага года глядзіць усе матчы з лаўкі запасных. Яшчэ ніводнага матчу пасля зімовай паўзы ў РПЛ не згуляў Міхаіл Сівакоў, але затое правёў тры сустрэчы ў Кубку Расіі. На мінулых выходных упершыню не згуляў за «Балтыку» Кірыл Капленка, які туды перайшоў зімой за 1,6 млн еўра.
Трансферны рэкорд белфутбола за 11 гадоў – у Расii даюць 1,6 мiльёна за Капленку. Колькi?! За каго?!
20 красавіка паўабаронца назіраў за перамогай сваёй каманды над «Крыламі» (2:1) з лавы запасных, а на наступны дзень згуляў тайм за дубль супраць рэзервістаў «Енісея» (3:0) у тым самым расійскім Д4.
Трансферы Капленкі, Карпіцкага і Кудраўца ўваходзяць у топ-3 самых дарагіх пераходаў беларускіх футбалістаў за апошнія два трансферныя акны. Але ў расійскіх клубах пакуль лічаць за лепшае выкарыстоўваць іх у чацвёртым па сіле дывізіёне краіны.
